Eftir að hafa eytt síðustu tveimur dögum í að lesa gömlu bloggin mín og hlæja yfir hversu ótrúlega mikið ég hef breyst velti ég því fyrir mér hvort ég ætti að blogga.

Ég ákvað að sleppa því. Ég held að þessi síða sé endanlega dauð.

En hver veit.

 

 Gleðileg jól!

Hafiði það sem frábærast um jólin og takk fyrir árið sem er bráðum búið

... er nýji uppáhalds málmurinn minn Ekki það að ég hafi átt einhvern fyrir en...

Natríum er nefnilega voðalega skemmtilegur málmur. Hann er það mjúkur að það er hægt að skera hann, og það þarf að geyma hann í sérstakri olíu af því að hann er rosalega hvarfgjarn bæði við vatn og loft. Ef hann kemst í tæri við annað hvort, verður hvarfið svo hratt að hann springur

Í dag í efnafræði fórum við útá tjörn og sprengdum natríum. Það kom mér mjög á óvart hvað þetta var mikil sprenging miðað við svona lítinn bút. Alveg hreint magnað

               

Þetta er natríum                                  og svona gerist þegar það springur

Dagurinn í dag er búinn að vera frábær. Ég elska svona daga þar sem allt gengur upp og maður verður fáránlega jákvæður um að næstu dagar eigi eftir að vera svona æðislegir líka.

Meðal þess sem var svona frábært í dag var að ég þurfti bara að fara í þrjá tíma, mér gekk fáránlega vel í stærðfræðiprófinu og ég fór í atvinnuviðtal sem gekk líka vel Af hverju geta dagarnir ekki alltaf verið svona?

Kannski er þetta vegna þess að pabbi og Jómundur eiga afmæli í dag

Ég vona að þið hafið átt jafn góðan dag og ég

 

Ég veit ekki með ykkur, en ég er bara komin í hálfgert jólaskap við að sjá allan þennan snjó Vanalega er mér ekkert allt of vel við snjó, hann er kaldur og blautur og leiðinlegur, en samt verð ég alltaf glöð að sjá fyrsta snjóinn, þó það breytist reyndar þegar ég man hversu leiðinlegur hann getur verið En ég vil samt hafa hvít jól

Framundan eru skemmtilegir tímar, eplaballið er í næstu viku og það eru bara 5 vikur eftir af skólanum Þær mega samt alveg vera lengi að líða því að ég var að fatta að ég verð í 4 vikur í jólafríi Svo ef 5 vikur verða lengi að líða hljóta fjórar að vera ágætlega langar líka ;D

Svo ætlum við mamma að skella okkur til Boston 7.des, daginn sem ég klára jólaprófin  Við verðum reyndar bara í fjóra daga, en við ætlum að nýta þá vel í jólagjafakaup og önnur kaup Ég er farin að hlakka mjög mikið til, Boston er svo æðisleg borg og ég hlakka til að sjá hana í jólabúningnum

Í dag er ár síðan við vinkonurnar ákváðum að innsigla órjúfanlega vináttu okkar með tattúi.

 Vá hvað tíminn líður hratt.

Ég gerði mér alveg grein fyrir því að það yrði mikið að gera á 4. ári en aldrei hélt ég að það yrði svona mikið. Ekki það að ég sé að kvarta, það er fínt að hafa eitthvað að gera en öllu má þó ofgera. Ég held að það sé ekki ein vika þar sem það var ekkert próf eða stórt verkefni sem þurfti að skila. Áður sleppti maður að læra heima af því að maður nennti því ekki en núna gerir maður það af því að maður hefur ekki tíma til að gera það fyrir öllum prófunum og verkefnunum.
Það eru samt alveg kostir við þetta líka. Maður lærir t.d. að meta þær helgar sem maður er ekki á kafi í verkefni eða að læra fyrir þrjú próf í einu mjög mikið og nýta þær vel í að gera allt annað en læra og maður þarf aldrei að stara út í loftið af því að það er gjörsamlega ekkert að gera.

Ég held að ein skýringin á þessu amsti sé sú að maður getur ekki leyft sér að vera kærulaus yfir önnina og tekið þetta svo bara með trukki í lokaprófunum af því að sum fögin hreinlega bara krefjast þess að það sé lært jafn og þétt yfir alla önnina. Ég er t.d. í tveimur fögum núna sem ég get sleppt að taka jólapróf í ef ég fæ yfir 7 í meðaleinkunn úr öllum skyndiprófum og verkefnum. Og maður er sko alveg til í að leggja á sig ýmislegt til að sleppa við jólapróf. Svo eru önnur fög þannig að ef maður lærir ekki málar maður sig alveg út í horn af því að þá skilur maður ekki það sem kemur á eftir. Svo ég held það sé eins gott að læra þetta bara allt saman.
En allavega, það sem heldur mér gangandi núna er tilhugsunin um haustfríið sem byrjar í næstu viku og það að ég þarf mögulega bara að taka tvö jólapróf ;D

Vá þetta er leiðinlegt blogg

Svo verð ég ein heima í viku frá morgundeginum Reyndar og systur. Og hundur. En mamma og pabbi eru semsagt að fara í golfferð til Spánar í viku og skilja okkur eftir hérna í kuldanum á meðan. Skemmtileg. Ekki það að ég gæti farið með þótt ég vildi, kennararnir sjá til þess að við lærum nú yfir okkur fyrir haustfríið og sjá örugglega til þess að við höfum nóg að gera í "fríinu" okkar. En ég kvarta ekki meðan þetta heitir frí. Svo erum við stelpurnar nú að fara í bústaðaferð helgina eftir það svo það er nóg að hlakka til

En þar sem ég ætti að vera að gera jarðfræðiverkefni eða læra fyrir stærðfræði og efnafræði er kannski best að ég nýti tímann í eitthvað annað en að blogga hundleiðinlegt blogg sem enginn les

Lífið getur verið ljúft þegar maður fær miklu hærra á stærðfræðiprófinu en maður þorði að vona.

Lífið getur verið ljúft þegar maður skilur allt í einu öll efnafræðidæmin sem maður á að gera fyrir morgundaginn.

Lífið getur verið ljúft þegar maður man að það er dansæfing á eftir.

Lífið getur verið ljúft þegar foreldrar manns verða ekki heima um helgina. (Ekki það að þau séu eitthvað slæm)

Lífið getur verið ljúft þegar maður ákveður hitting með frábærasta fólki í heimi.

Lífið getur verið ljúft þegar maður hlustar á Nouvelle Vague.

Lífið getur verið voða ljúft þegar maður er ég.

 

Ég myndi blogga eitthvað skemmtilegt ef stærðfræðiprófið í dag hefði ekki dregið alla ánægju úr deginum.

Í staðinn skora ég á Möggu móðu að fara að blogga aftur. Þetta er að verða komið ansi gott sumarfrí hjá þér

Þannig er líf mitt þessa dagana. Indælt. Jaðrar jafnvel við að vera frábært held ég bara. Þannig verður næsta vika allavega. Frábær. Ástæðurnar fyrir því eru nokkrar, aðallega samt þær að ég byrja í dansi oog béin þrjú! ;P

Béin þrjú? Hvað skildi hún nú meina með því? Jú, það vill svo skemmtilega til að þrír afar skemmtilegir hlutir gerast allir í næstu viku og byrja allir á B Þeir eru Busun-Ballið-Bústaður!
Ójá, gott, betra, best og alveg í réttri röð.

Fyrst kemur að busuninni, sem verður sérstaklega skemmtileg þetta árið þar sem ég fæ að pína en ekki vera pínd ;D Já, það er loksins komið að því að ég fái að vera böðull sem verður fjör Nú, busuninni fylgir alltaf busaball, sem verður sérstaklega skemmtilegt þetta árið þar sem þetta er síðasta busaballið sem ég fer á! Jii minn hvað maður er orðinn stór. Svo til að slá botninn í annars góða viku ætlum við stelpurnar í bústaðaferð, sem var einmitt bara verið að ganga frá áðan svo þetta var svona frekar mikil skyndiákvörðun En það er alltaf gaman af þeim ;P Ég er að minnsta kosti farin að hlakka mjög mikið til komandi viku

Jæja, þá er sumarið á enda. Skólinn byrjar á morgun og ég er ekki frá því að ég hlakki svolítið til Ótrúlegt að þetta sé síðasta árið, mér finnst ég hafa byrjað í Kvennó í gær. Ég er búin að fá stundatöfluna, sem lítur bara mjög vel út, og kaupa bækurnar sem eru reyndar bara tvær í bili þar sem allt hitt er "tilkynnt síðar." En ég held að þetta skólaár eigi eftir að vera frábært, finn það á mér.

Ég þarf samt að reyna að finna skipulagningu einhvers staðar í mér því ég á eftir að þurfa á henni að halda í vetur Er bara í raunvísindafögum, engum tungumálum, félagsfræði eða svoleiðis tímaeyðslu svo það á eftir að vera mikið að læra heima Og svo þarf náttúrulega dansinn, vinnan og ræktin að passa inní líka svo ég þarf að fara að finna þessa skipulagningu sem ég hlýt að eiga til einhversstaðar.

En jæja, ætla ekki að hafa þetta mikið lengra. Þið (Magga og Brynhildur, sem eru held ég þær einu sem lesa þetta) þurfið samt ekki að örvænta því núna er komið haust sem þýðir að það verður meira leiðinlegt sem ég þarf að gera sem hefur það í för með sér að ég fæ miklu oftar óstjórnlega löngun til að blogga. Skrítið.

Jæja, þá er ég búin að kveðja vinnuna í bili og Tyrkland kallar ;D Þetta verður nú bara svona stutt kveðjublogg þar sem ég er nú að fara í nótt Taskan er komin upp á flugvöll, hún var svo spennt svo hún fer degi á undan mér og tekur svo á móti mér á morgun. Þetta er svo langþráð frí, ég held ég hefði ekki getað meikað einn dag í viðbót í vinnunni, ég er algjörlega komin með nóg. Ég vinn reyndar líklegast tvo þrjá daga þegar ég kem heim, en það eru alveg rúmlega tvær vikur í það svo það ætti nú að vera í lagi.

Það verður ææði

Svo verður líka gaman þegar ég kem heim úr sólinni því þá bíður mín líkast til nýr bíll Já, ég er loksins að fá mér bíl, rakst á þennan líka sæta peugeot sem bara kallaði á mig

Hann er awesome ;D Þannig það verður ekkert leiðinlegt að koma heim

 

En við sjáumst þá eftir tvær vikur ;D

Jæja jæja. Sex vaktir búnar, fjórar eftir. Ég er hálfnuð og ég er lifandi. Þessir sex dagar eru búnir að vera þeir verstu sem ég hef upplifað í langan tíma. Ég er bara búin að vinna og sofa og þori ekki að hugsa fram í tímann af ótta við að fatta hvað það eru margir dagar eftir af stanslausri vinnu. Fólk getur verið svo ótrúlega dónalegt og leiðinlegt að það hálfa væri nóg, jafnvel bara einn fjórði. Og svo til að bæta gráu ofan á svart er búið að vera æðislega dásamlegt veður alla dagana svo ef ég stend ekki sveitt yfir grillinu, sem þið getið ekki ímyndað ykkur hvað manni verður heitt við í þessum hita, þá er ég að ofnota úlnliðinn við ísvélina. Það kom t.d. heill leikskóli í dag svo ég gerði yfir fimmtán ísa á fjórum mínútum, og svo gafst ég upp á að telja sjeikana eftir að vera komin yfir tíu og klukkan var ekki orðin þrjú. Þetta er orðið það slæmt að ég er meira að segja í vinnunni í anda á næturnar því ég hrekk oft upp við það að "maðurinn gleymdi frönskunum sínum" eða eitthvað svoleiðis. Það eina sem heldur mér gangandi held ég er tilhugsunin um að eftir fjórar vikur verð ég úti á Tyrklandi. Þar fæ ég allavega nóg af góðu veðri og enga dónalega viðskiptavini, sem er mjög ánægjuleg tilhugsun. En þangað til verð ég bara að reyna að þrauka, það eru "ekki nema" fjórir dagar eftir og svo er ég komin í heilt tveggja daga frí sem ég sé í hyllingum fyrir mér á daginn. En ég ætlaði bara að láta vita af mér, fæturnir mínir æpa á rúmið svo ætli ég verði ekki að fara að sofa, allavega ef ég ætla að þrauka allan morgundaginn. Heyrumst. (vonandi)

Jæja, þá er mín bara orðin nítján ára Ég verð þó að viðurkenna að afmælisdagurinn gæti hafa verið betri þar sem ég var að vinna í tólf og hálfan tíma sem er ekki það skemmtilegasta sem ég geri. En sem betur fer fékk ég nokkrar heimsóknir í vinnuna sem glöddu mig mikið Takk fyrir það Gyða mín, Thelma og Sævar. Eins og venjulega var svo gott veður á afmælisdaginn minn sem ég vona að allir hafi nýtt betur en ég, sem var föst inni við ísvélina allan daginn..

Ég hafði þó tíma fyrir vinnu að taka á móti afmælisgjöfum frá familíunni sem voru awesome Fékk nýjan síma, hilluskúffuthingy fyrir draslið mitt og sæta mynd á tóma vegginn minn Svona núna ætti herbergið mitt loksins að fara að verða tilbúið Frumsýni það í kvöld þar sem dagurinn í dag fer í að koma öllu fyrir í skúffunum, hengja upp myndina og snattast aðeins. Þarf meðal annars að fara og borga Tykrlandsferðina, sem er einmitt akkúrat eftir mánuð í dag ;D

En, því miður mun ég ef til vill aðeins kynnast því hvernig það er að vera nítján í nokkra daga. Það gæti farið svo að ég fái frekar að kynnast hægum og kvalarfullum dauðdaga. Ástæðan fyrir því er að næstkomandi föstudag byrja ég fyrstu tólf tíma vaktina mína af tíu. Í röð! Og trúið mér, það er mun skelfilegra en það hljómar. Ég er orðin dauðleið og þreytt eftir þrjá daga (vaktaplanið er alltaf vinna í tvo eða þrjá daga og svo frí í tvo eða þrjá daga) svo ég veit ekki hvernig ég verð eftir tíu. Svo ég vildi bara nota tækifærið í kannskivonandiekki þessu síðasta bloggi og þakka ykkur öllum fyrir allt. Það var gaman að kynnast ykkur og við skulum öll bara krossa fingur og vona að ég verði enn hérna eftir tólf daga.

Jæja, þá er loksins komið að skemmtilegasta tíma ársins - Sumarfríinu

Við stelpurnar byrjuðum snemma og skelltum okkur í bústað síðustu helgi sem var alveg frábært, held að allir hafi skemmt sér mjög vel

Næstu helgi er ég svo að fara til Madrid með kórnum Við verðum alveg í átta daga svo þar verður mikið verslað og skemmt sér ;D og sungið auðvitað.

Svo tekur bara við mikil vinna í rúmlega mánuð og eftir það er komið að aðalviðburði þessa sumars, og þá er ég, ótrúlegt en satt, ekki að tala um afmælið mitt þann 26. júní
Ónei því að í lok júlí er komið að útskriftarferðinni Förum til Tyrklands og verðum í tvær vikur í sól og sumaryl áður en við hefjum síðasta árið okkar í Kvennó  Trúi varla að það sé bara eitt ár eftir, þetta er búið að líða svo hratt! En ég held að sá sem sagði að menntaskólaárin væru með bestu árum lífs manns hafi ekki verið að ljúga

En ég ætla ekkert að vera að hafa þetta lengra, bara aðeins að láta vita af mér